ПРИРОДНО ПОРОДУВАЊЕ
Повеќето идни мајки инсистираат на царски рез од причина што имале можност да слушаат за различни негативни искуства при природното породување. Без разлика дали постои страв од вагиналното породување, за мајката е идеално да се породи по природен пат, освен ако некои болести кај мајката или положбата на детето не го дозволуваат тоа. Болката може да се контролира со епидурална или со спинална аналгезија. Се работи за обезболување кое се става локално во грбот меѓу прешлените и жената свесна, без болки полесно го поднесува породувањето. По породувањето жената може веднаш да стане да се движи и сама да се грижи за своето дете.
ЦАРСКИ РЕЗ
Царскиот рез е хируршка процедура како и секоја друга. Се изведува со низок рез во долниот дел на стомакот. Трае околу пола час, но може и подолго доколку породувањето се искомплицира. Заздравувањето од царски рез трае подолго за разлика од вагиналното породување. Болките обично траат еден до два дена, но можна е и мачнина поради анестезијата. По интервенцијата жената останува во болница до пет дена, за разлика од природното породување кога си оди по два до три дена.
ПРИЧИНИ ЗА ЦАРСКИ РЕЗ
Во последните две децении бројот на породувања со царски рез е значително зголемен. Причина за ова се и годините на родилките поради сè почестото одложување на мајчинството. Бременостите со висок ризик за здравјето на жената, поради висок крвен притисок, дијабетес, проблеми со бубрезите, срцеви проблеми, вештачко оплодување се најчестите причини за царски рез. Исто така, со царски рез се породуваат и жените кои носат голем плод, а имаат тесна карлица, во ситуации кога бебето има карлична положба, односно со задникот е свртено надолу, или кога жената носи повеќе плода. Сепак, треба да се води сметка, односно жената не би требало да има повеќе од три породувања со царски рез.
КОНТРАИНДИКАЦИИ ЗА ЦАРСКИ РЕЗ
Царски рез не се препорачува доколку постојат генетски аномалии кај плодот и доколку овие аномалии се фатални за плодот. Потврдено е дека бебињата родени по природен пат имаат помалку тешкотии со дишењето по раѓањето за разлика од бебињата родени со царски рез, кои, пак, изгледаат поздрави и поубави, наспроти често „измачените“ бебиња кои поминуваат низ вагиналниот канал. Поради општата анестезија која се дава, доколку не е спинална, бебето се адаптира побавно на надворешната средина. Проблеми може да има и мајката. Кај неа е зголемен ризикот за настанување тромбоза и инфекција на резот, а може да има проблеми и со лактацијата.
